Pétri Thomsen (1973) hlotnuðust hin virtu og eftirsóttu LVMH-verðlaun, sem veitt eru ungum listamönnum, þegar þau voru afhent í tíunda sinn, árið 2007. Imported Landscape eða Aðflutt landslag er mögnuð syrpa ljósmynda sem lýsir hrikalegri umbreytingu landslagsins við Kárahnjúka þegar tæknimenningin með allri sinni nákvæmni og skipulagi ræðst gegn óspilltri náttúrunni umhverfis Hafrahvammagljúfur og brýtur landið undir sig miskunnarlaust. Risastórar jarðýtur fara um landsvæðið og skilja eftir sig svöðusár líkt og bit í holdi eftir fiðlukönguló. Pétur lýsir þessum ójafna leik með dramatískri hlutlægni sem skilur áhorfandann eftir í uppnámi.


Cars in rivers
16.9. - 7.11. 2010
Sýning á tveimur ljósmyndaseríum eftir Ólaf Elíasson, Cars in rivers, 2009 og Jökla series, 2005.
Í tilefni af gjöf Ólafs Elíassonar á 35 mynda myndröð sinni "Cars in rivers" -  til Listasafns Íslands, efnir stofnunin til lítillar sýningar á verkinu, um leið og brugðið er ljósi á tengsl listamannsins við öræfi landsins, með sínum urðum, klungrum og illkleifu vatnsföllum. Öræfi Íslands hafa löngum átt hlutdeild í list Ólafs Elíassonar enda eyddi hann mörgu sumrinu í námunda við ár og jökla landsins þegar hann var ungur að árum.
Cars in rivers, 2009 lýsir barningi mannsins við óútreiknanlega náttúru, um leið og myndröðin gæti með táknrænum hætti lýst efnahagshremmingum þeim sem við Íslendingar höfum lent í síðustu misserin og mætti líkja við kafsiglingu torfærubíla í straumhörðum vatnsföllum.
Jökla series, 2005 er skrásetning listamannsins á Jökulsá á Dal (Jöklu) frá jökulrótum að svæðinu þar sem Kárahnjúkastífla rís, en reyndar var stíflan langt komin þegar myndröðin var unnin. Síðan fylgdi listamaðurinn ánni töluvert langt áleiðis í átt að ósi. Hér er því um einstæða heimild að ræða því Jökla hefur algjörlega breytt um svip.


KARL KVARAN
Yfirlitssýning
17.11. 2010 - 13.2. 2011
Karl Kvaran var meðal helstu forvígismanna geometrískrar abstraktlistar
á Íslandi upp úr miðri síðustu öld. Hann hélt tryggð við einfalda,
markvissa formbyggingu verka sinna og telst því meðal helstu tengiliða
franskættaðrar abstraktlistar og mínimalískrar tjáningar sem leysti
fyrri skyldar liststefnur af hólmi. Eftir á að hyggja skar Karl sig úr hópi
samferðamanna sinna sökum einstæðrar samkvæmni í verklagi og
myndhugsun. Þótt hann hyrfi frá beinum línum hreinflatastefnunnar og
hneigðist til sveigðrar og hringlaga formmótunar varð málaralist hans æ
hreinni og beinni þótt tilfinning hans fyrir samspili vídda yrði að
sama skapi margslungnari eftir því sem á leið. Litanotkun hans var
sérkapítuli enda tefldi hann óragur saman gagnkvæmum litflötum með
skærum skala sem rífur í sjóntaugarnar. Að þessu leyti brúaði Karl
bilið milli abstraktmálverks og popplistar, en bak við þá leikni með
litrófið bjó einstök teiknikunnátta.